संसदको हिउँदे अधिवेशन तत्काल आह्वान गर्न सरकारसँग पूर्वसभामुखहरुको आग्रह

Himalaya Television
२०७७ कार्तिक २२ गते १४:१०

संसदको हिउँदे अधिवेशन तत्काल आह्वान गर्न सरकारसँग पूर्वसभामुखहरुको आग्रह

२२ कात्तिक, २०७७ काठमाडौं । पूर्वसभामुखहरुले संघीय संसदको हिउँदे अधिवेशन तत्काल आह्वान गर्न सरकारसँग आग्रह गरेका छन् ।

संक्रमणकालिन अवस्थामा जनताको समस्या सम्बोधन गर्न र सरकारलाई सही बाटोमा डोहो¥याउन पनि संसदको आवश्यकता रहने भएकाले अधिवेशन तत्काल आह्वान गर्न पूर्व सभामुखहरुले आग्रह गरेका हुन् ।

संसदको आवश्यकता लोकतन्त्रमा महत्वपूर्ण रहेको भन्दै तत्काल अधिवेशन आह्वान गर्नुपर्ने पूर्वसभाुमखहरुको भनाइ छ । लामो समय संसद बन्द हुँदा सरकार अराजक बन्ने खतरा हुने भएकाले तिहारलगत्तै अधिवेशन आह्वान हुनुपर्ने पूर्वसभामुखहरुले बताएका छन् ।

पूर्वसभामुख ओनसरी घर्तिले तिहारपछि अनिवार्य रुपमा संसद चलाउनुपर्ने बताउनुभयो । संविधान अनुसार ६ महिनाभन्दा बढी समय संसद बन्द गर्न नहुने स्मरण गराउँदै उहाँले अहिलेको अवस्थामा जनप्रतिनिधिहरुले जनताका कुरा राख्न पनि संसद अनिवार्य रहेको बताउनुभयो ।

कोरोना महामारीको समयमा सबै राजनीतिक दल एकै ठाउँमा रहेको अवस्थामा संसदबाट यस सम्बन्धि थप छलफल र बहस गर्नु अझ राम्रो हुने उहाँले बताउनुभयो । जनताको प्रतिनिधिमूलक संस्था संसद बन्द हुँदा देशमा अराजकता मौलाउने डर हुने उहाँले बताउनुभयो । विधि विधान अनुसार एउटा प्रक्रियामा अगाडी बढ्नका लागि संसदको आवश्यकता रहेको उहाँले बताउनुभयो ।

उहाँले भन्नुभयो, ‘‘जनताको प्रतिनिधिमूलक संस्था नचल्दा अराजकतातिर जान्छ । विधि, विधान अनुसार एउटा प्रक्रियामा अगाडी बढ्नका लागि पनि संसद चल्नुपर्छ । प्रतिपक्षी दलले आफ्ना कुरा राख्नुपर्छ । जुनसुकै दलले पनि जनताका कुरा राख्न सक्छन् । संसद जनताको प्रतिनिधिमूलक संस्था भएकाले नियम, प्रक्रिया र विधि विधानमा आउँछ । राष्ट्र र जनतामा परेको समस्यालाई केन्द्रिकृत गरेर वैज्ञानिक ढंगले समाधान गर्ने बाटोतिर जान सकिन्छ । संसद अनिवार्य छ ।’’

स्वास्थ्य सुरुक्षाका मापदण्ड अपनाउँदै जुनसुकै अवस्थामा पनि संसद सञ्चालन गर्नुपर्ने उल्लेख गर्दै उहाँले भन्नुभयो, ‘‘६ सय सांसदको म्यानेज भएको ठाउँ हो । अहिलेको संख्या एकदमै सानो हो । संसद सचिवालयले योभन्दा पहिलेको बैठक पनि दूरी बनाएर सञ्चालन गरेको थियो । सांसदहरुले आफ्नो ठाउँबाट सतर्कता अपनाउने । यातायातको साधन नभएका सांसदका लागि म्यानेज गरियो, सानाभन्दा साना कुराको म्यानेग गरियो भने संसद चल्न नसक्ने हुन्न । संसद रिस्क मोलेर पनि चल्नुपर्छ । किनकी त्यो त जनताको प्रतिनिधिमूलक संस्था हो । जनताको जीवनरक्षाका लागि जनताले आफ्ना काम अगाडी बढाउनपर्ने अप्ठ्यारा पनि संसदले सम्बोधन गर्नुपर्छ ।’’

पूर्वसभामुख रामचन्द्र पौडेलले राज्य सञ्चालन गर्ने र सरकारलाई बाटो देखाउने भएकाले संसद अधिवेशन सुचारु गर्नु अनिवार्य भएको बताउनुभयो । सरकारले संसदको अधिवेशन बन्द गर्दा कतिपय तत्काल बन्नुपर्ने ऐन, कानूनहरु अलपत्र परेको उहाँले बताउनुभयो ।

प्रधानमन्त्री केपी शर्मा ओलीले सत्ता स्वार्थका लागि आकस्मिक रुपमा संसद अधिवेशन अन्त्य गरेको उल्लेख गर्दै पूर्वसभामुख पौडेलले सत्तारुढ दलले एकाधिकार लाद्न खोजको दृष्टान्त हो भन्न्नुभयो ।

तिहार र छठलगत्तै अधिवेशन सुरु गर्नुपर्ने उल्लेख गर्दै उहाँले भन्नुभयो, ‘‘संघीय लोकतान्त्रिक प्रणालीमा संसद अभिन्न अंग हो । त्यसले नै राज्यलाई सञ्चालित गर्छ । सरकारलाई बाटो देखाउँछ । सरकारलाई आफ्नो कर्तव्यमा हिड्न लगाउँछ । यसको आवश्यकता लोकतन्त्रमा महत्वपूर्ण हुन्छ । अहिले संसद अधिवेशन अन्त्य गरेर कतिपय बन्नुपर्ने कानून नियमहरु बन्न सकेनन् । आकस्मिक रुपमा सत्ता स्वार्थका लागि प्रधानमन्त्रीले अधिवेशन अन्त्य गर्नुभयो । यो सत्तााधारीको मनोपोलीको दृष्टान्त हो । संसद अधिवेशन तोकिएको समयमा चल्छ । त्यसको एउटा नियम हुन्छ । आवधिक निर्वाचन, आवधिक समयवद्ध काम लोकतन्त्रको अनुशासन हो । संसदले शासकलाई अनुशासनमा राख्ने बाटो देखाउने, देशलाई नीति निर्देशन गर्ने नियम कानून बनाउने थलो रोकेर यसरी राख्न हुने थिएन । संसद अपरिहार्य छ । समय नआउँदै अधिवेशन अन्त्य गरियो । अब हिउँदे अधिवेशन तिहार र छठपछि सुरु गर्नुपर्छ । देशलाई दिशा दिनुपर्छ ।’’

सरकारले आकस्मिक रुपमा संसद अधिवेशन अन्त्य गर्दा प्रतिपक्षी दलले दतारुकता देखाउन नसकेको उहाँले स्वीकार गर्नुभयो । संसदको क्रियाशिलता कायम राख्न तत्काल संसद बोलाउनुपर्ने पक्षमा कांग्रेस रहेको उहाँले बताउनुभयो । सरकारले संसद अन्त्य गरेर लोकतन्त्रको आत्ममा मार्ने काम भएको उल्लेख गर्दै उहाँले संसद सुचारु गरेर लोकतन्त्रको आत्मा जोगाएर देशलाई समृद्धितर्फ लैजान सकिने बताउनुभयो ।


प्रतिक्रिया

Leave a Reply

Your email address will not be published. Required fields are marked *