सीमा नजिक बनेका सडक, बाँध, तटबन्धलगायतको संरचना भत्काउन पहल गर्न निर्देशन

Himalaya Television
२०७७ असार २९ गते १६:५८

सीमा नजिक बनेका सडक, बाँध, तटबन्धलगायतको संरचना भत्काउन पहल गर्न निर्देशन

२९ असार, २०७७ काठमाडौं । संसदीय समितिले सीमा नजिक बनेका सडक, बाँध, तटबन्ध लगायतका भौतिक संरचनाहरु तत्काल हटाउन सरकारलाई निर्देशन दिएको छ ।

संघीय संसद प्रतिनिधि सभाअन्तर्गतको राज्य व्यवस्था तथा सुशासन समितिले अन्तर्राष्ट्रिय मापदण्डविपरीत सीमा नजिकैका क्षेत्रहरुमा निर्माण भएका सडक, बाँध, तटबन्धलगायतका भौतिक संरचनाहरु तत्काल हटाउन पहल गर्न नेपाल सरकार गृह मन्त्रालयलाई निर्देशन दिएको हो ।

सीमा निजक बनेका संरचनाहरुले नेपालतर्फ डुवान परेकाले त्यस्ता संरचनाहरुलाई तत्काल हटाउनुपर्ने समिति सभापति शशी श्रेष्ठले बताउनुभयो । समितिले भू–बनोटको जाँच गरी उच्च जोखिममा रहेका बस्तीहरुलाई अन्यत्र सुरक्षित ठाउँमा स्थानान्तरण गर्न समेत निर्देशन दिएको छ ।

यस्तै डुबानमुक्त घरको नमूना तयार गरी एकीकृत वस्ती बसाल्न आवस्यक व्यवस्था गर्न निर्देशन दिइएको सभापति श्रेष्ठले बताउनुभयो । बाढी पहिरो र डुबानबाट प्रभावितहरुलाई सुरक्षित स्थानमा स्थानान्तरण गरी स्थायी समाधानका लागि कार्ययोजना वा गुरुयोजना तयार गर्न समेत निर्देशन दिएको छ ।

समितिले बाढी पहिरो र डुबानबाट पर्न सक्ने असरलाई तत्काल व्यवस्थित गर्न स्थानीय तहमा श्रोत साधनसहितको विपद व्यवस्थापन कार्यालयको स्थापना गर्न समेत निर्देशन दिएको छ । बाढी पहिरो र डुबानबाट बेपत्ता भएकाहरुको तत्काल खोजी उद्धार गर्ने र बाढीबाट प्रभावित सम्पूर्ण पीडितहरुलाई विभिन्न तहहरुको समन्वयद्धारा एकद्धार प्रणालीमार्फत राहत उपलब्ध गराउन समेत निर्देशन दिएको छ ।

समितिले बाढी प्रभावित क्षेत्रहरुमा स्वास्थ्य सेवा तथा सरसफाई, सर्पदंश तथा अन्य औषधि उपचारको अवस्यक व्यवस्था गर्न समेत निर्देशन दिएको छ । विपदको समयमा हुनसक्ने सम्भावित चोरी डकैति, बलात्कार र महिलामाथि हुन सक्ने हिंसाका घटनाहरु प्रति सजग रही भरपर्दो सुरक्षा प्रबन्ध मिलाउन समेत गृह मन्त्रालयलाई निर्देशन दिएको छ ।

यस्तै नेपालमा बन्दै गरेका लोकमार्गको बैज्ञानिक व्यवस्थापन गरी राजमार्ग जोडने सडकहरु, पानीधारलाई समानान्तर बनाउने, रेलमार्ग तथा सडकमा निश्चित दूरीमा पानीको निकासका लागि साइफन कल्भर्ट र सडक किनारमा नालाहरु अनिवार्य बनाउने व्यवस्था गर्न समेत निर्देशन दिएको छ ।


प्रतिक्रिया

Leave a Reply

Your email address will not be published. Required fields are marked *