Breaking News

बेपत्ता पत्रकार खड्काको सैनिक हेलिकप्टरद्वारा खोजी

बाजुरा, २८ कार्तिक ।

बाजुराको उत्तरी भेगमा पर्ने धार्मिक तथा पर्यटकीय क्षेत्रका रूपमा रहेको बूढीनन्दामा तीन महिना पहिले हराएका पत्रकार तेजबहादुर खड्का (तेजु)को नेपाली सेनाको हेलिकप्टरबाट खोजी कार्य भएको छ ।

गत भदौ ९ गते बूढीनन्दा माताको दर्शन गरेर घर फर्किने क्रममा छाप्रोबाट बरमाग्नेतर्फ जुत्ता–चप्पल लिन गएका पत्रकार खड्का बपत्ता भएका थिए ।

बेपत्ता भएका पत्रकार खड्काको खोजीका लागि नेपाली सेनाको हेलिकप्टर आज बिहान सुर्खेतबाट कोल्टीमा अवतरण गर्दै थप खोजीका लागि स्थानीय नेपाली सेना, नेपाल प्रहरीलाई घटनास्थलमा पुर्‍याएर खोजी कार्य भइरहेको प्रजिअ चेतराज बरालले जानकारी दिए ।

अज्ञात रहेका खड्काको जिल्ला प्रशासन, पत्रकार महासङ्घ, नेपाल प्रेस युनियन र सरोकारवालाहरूको पहलमा हेलिकप्टरबाट खोजी गर्न सम्भव भएको नेपाल पत्रकार महासङ्घ केन्द्रीय सदस्य मीनबहादुर बमले बताए ।

बेपत्ता भएका खड्काको खोजीका लागि गृह मन्त्रलायले रक्षा मन्त्रालयलाई हेलिकप्टरबाट खोजीका लागि पत्र पठाएर हेलिकप्टर परिचालन गरिएको जिल्ला प्रशासन कार्यालय बाजुराले जनाएको छ ।

खोजीमा संलग्न भएका टोलीले खाद्यान्नसमेत लिएर गएको बूढीनन्दा रेडियोका प्रबन्धक अनिल शाहीले बताए । हेलिकप्टरले स्थानीयवासीलाई घटनास्थल पुर्‍याएर केही संवेदनशील स्थलहरूमा हेलिकप्टरमार्फत खोजी गर्ने बताइएको छ ।

करिब १५ वर्ष रेडियो नेपालको स्थानीय प्रतिनिधि भएर र ६ महिना रेडियो नेपाल सिंहदरबारमा काम गर्दै हाल रेडियो बूढीनन्दामा कार्यरत पत्रकार खड्का बेपत्ता भएको तीन महिना बितिसक्दा पनि अवस्था अझै अज्ञात रहेको छ ।

shares