Breaking News

हुम्लामा पनि औलोका बिरामी

हुम्ला, २९ भदाै । हिमाली जिल्ला हुम्लामा सात जना औलो राेगका बिरामी भेटिएका छन् ।

प्रायः तराईका जिल्लामा मात्र देखिने औलो रोग पछिल्लो समय उत्तरी हिमाली जिल्लामा समेत देखिन थालेपछि स्वास्थ्य क्षेत्रमा थप चुनाैति थपिएकाे हाे । हुम्लाको समुन्द्री सतहदेखि ४ हजार देखि ५ हजार फिट उचाई  रहेको जिल्लामा  पनि औलो रोग देखिएपछि जिल्ला अस्पताल हुम्लालाई चुनाैति बढेकाे छ ।

हुम्ला जस्तो चिसो ठाउँमा समेत यस वर्ष देखि ग्रामिण क्षेत्रमा रहेका स्वाथ्य चौकीहरूमा औलो रोगी देखापरेका जिल्ला अस्पताका डा. रन्जित कुमार यादवले बताए । यो आर्थिक वर्षमा मात्रै  एक दर्जन औलो रोगका लक्षण भएका बिरामी भेटिएको उनले बताए । २०७५ बैशाखमा मात्रै सर्केगाढ गाउँपालिकामा रहेको  स्वास्थ्य चौकीमा २ जान, ताँजकोट गाउँपालिकामा रहेको स्वाथ्य चौकीमा २ जना र अदनचुली गाउँपालिकामा ३  जना औलोका बिरामी फेला परेका छन् ।

गाउँमा औलो रोग फैलिएकाले औषधी र स्वास्थ्यकर्मीको अभाव देखिएको छ । ज्यान जोगाउने चिन्ता बढेको स्थानीयवासी ताँजकोट गाउँपालिका ५ का औलो बिरामी किशोर बुढाले बताए ।  औलो रोगका बिरामीको उपचारका लागि आवश्यक पर्ने ‘क्लोरोक्वीन र प्रिमाक्वीन’नामक औषधीको अभाव हुन नदिन जिल्ला स्वास्थय कार्यालय हुम्लाले पहल गरेको जनाएकाे छ।

रोगको नियन्त्रणका लागि अस्पतालसँग भएको औषधी र आवश्यक जनशक्ति प्रयोग भइरहेको जिल्ला अस्पतालका प्रमुख डा रन्जितकुमार यादवले बताए । जिल्लाका विभिन्न गाउँपालिकामा औलो रोगका बिरामी फेला परेपछि जिल्लाबाट डा. शरोज प्रजापती, ल्याव टेक्निशियन सुनिता तामाङ्गलगायतको टोली औलो रोग प्रभावित क्षेत्रमा खटिएकाे उनले जानकारी दिए ।

लक्षण

चिकित्सकहरूका अनुसार औलो रोग लाग्दा एक्कासी कामज्वरो आउने, ज्वरो आउने,  अल्छी लाग्ने, खानामा अरुचि हुने, जाडो लागेर कम्प हुने, मांसपेशीहरू दुख्ने, वाकवाकी लाग्ने, मन्द ज्वरो आइरहने, दिन बिराएर ज्वरो आउने र कलेजो सुन्निने लगायतका लक्षणहरू देखापर्छ ।

कसरी बच्ने ?

औलो रोग लामखुट्टेको टोकाइबाट सर्छ । घर वरिपरी लामखुट्टे बस्ने बासस्थान नष्ट गर्ने, लामखुट्टेको टोकाइबाट जोगिने, राति सुत्दा झुलको प्रयोग गनुपर्छ । त्यसैगरी, शरीरका खुला अंगहरूमा लामखुट्टेबाट बच्न सकिने मलम लगाउने, लामखुट्टेविरुद्ध प्रयोग गरिने स्प्रे, लिक्विड, म्याट आदिको प्रयोग गरेमा बच्न सकिन्छ । यदि एक दिन बिराएर ज्वरो आएमा, काम ज्वरो आएमा तुरुन्त चिकित्सककहाँ गएर उपचार गराउनुपर्छ ।

shares