Breaking News

प्रधानमन्त्रीको प्रतिबद्धता: नयाँ मुलुकी ऐन व्यवहारका क्रममा अपूर्ण देखिए सच्याइने

काठमाण्डौ, १ भदौ । प्रधानमन्त्री केपी ओलीले नयाँ मुलुकी ऐनमा कसैको अधिकार खोसिएको पाइए तत्काल सच्याउने प्रतिबद्धता व्यक्त गरेका छन् ।

प्रधानमन्त्री ओलीले आजबाट लागू गरिएको नयाँ मुलुकी ऐन व्यवहारका क्रममा अपूर्ण देखिए वा अनुपयुक्त लागे सच्याउने प्रतिबद्धता व्यक्त गरेका हुन् । शुक्रबार नयाँ मुलुकी ऐन लागू गरेको अवसरमा काठमाडौंमा आयोजित विशेष समारोहलाई सम्बोधन गर्दै उनले नयाँ मुलुकी ऐनको कार्यान्वयन सहज ढंगले अघि बढने र त्यसमा व्यवहारको क्रममा कमीकमजोरी भेटिए परिमार्जन गर्दै लगिने स्पष्ट पारे ।

प्रधानमन्त्री ओलीले नेपाललाई अझै व्यवस्थित, अनुशासित, सुसंगत र सुसम्बन्धका साथ अघि बढाउन नयाँ मुलुकी ऐन लागू गरिएको पनि स्मरण गराए । परिवर्तित सन्दर्भ र सोही परिवेश अनुसार नयाँ मुलुकी ऐन व्यापक छलफलका लागि लागू गरिएको प्रधानमन्त्री ओलीको भनाइ छ ।

कार्यक्रममा बोल्दै काययमुकायम प्रधानन्यायाधीश ओमप्रकाश मिश्रले इमान्दारितका साथ नयाँ मुलुकी ऐन कार्यान्वयनमा लाग्नुपर्नेमा जोड दिए । उनले मुलुकी ऐनलाई समय सापेक्ष सुधार गरेर नयाँ मुलुकी ऐन लागू गरिएको पनि स्मरण गराए । कामु प्रधानन्यायाधीश मिश्रले नयाँ मुलुकी ऐनले मुलुकलाई विधिको बाटोमा अघि बढाउने विश्वास पनि व्यक्त गरे ।

shares