October 23, 2017

सरकारले आज नीति तथा कार्यक्रम प्रस्तुत गर्दै, सोमबार बजेट आउने

काठमाण्डौ ११ जेठ । सरकारको वार्षिक नीति तथा कार्यक्रम आज व्यवस्थापिका संसद्मा पेस हुँदैछ ।

सरकारका तर्फबाट राष्ट्रपति विद्यादेवी भण्डारीले नीति तथा कार्यक्रम संसदमा पेस गर्नुहुनेछ । नीति तथा कार्यक्रम पेसका लागि अपरान्ह ४ बजे संसद् बैठक बोलाइएको छ ।

चुनावी आचारसंहिताका कारण यो पटक बजेट र वार्षिक नीति कार्यक्रममा कुनै नयाँ विषय समेटिएका छैनन् । नयाँ कार्यक्रमभन्दा पुरानै कार्यक्रमको निरन्तरता र विस्तारमात्र गरी नीति तथा कार्यक्रम तय भएको अर्थ मन्त्रालयले जनाएको छ ।

स्थानीय तहको संख्या थपको विरोधमा प्रमुख प्रतिपक्ष दलले सदनका अन्य कारवाहीमा अवरोध पुर्याए पनि नीति तथा कार्यक्रम र बजेट प्रस्तुतका लागि भने लचिलो देखिएको छ । सदन अवरुद्ध गर्ने एमालेको निर्णयमा कुनै पनि राजनीतिक सहमति हुन नसक्दा यो पटक प्रि बजेट छलफल हुन सकेन ।