October 20, 2017

प्रथम प्रधानमन्त्री कप एक दिवसीय क्रिकेट प्रतियोगितामा आर्मीको विजयी सुरुवात

काठमाण्डौ, ९ जेठ । त्रिभुवन आर्मी क्लबले प्रथम प्रधानमन्त्री कप एक दिवसीय क्रिकेट प्रतियोगितामा विजयी सुरुवात गरेको छ ।

कीर्तिपुरस्थित क्रिकेट मैदानमा आज सुरु भएको प्रतियोगिताको उद्घाटन खेलमा आर्मीले पूर्वाञ्चललाई ९ विकेटले हराएको हो । समूह ‘बी’ अन्तर्गत भएको खेलमा आर्मीले १ सय ४ रनको सामान्य लक्ष्य मात्र १८.४ ओभरमा १ विकेट गुमाएर भेट्टायो । आर्मीको जितमा अनिल मण्डलले ५६ तथा सागर पुनले ४० रनको योगदान दिए । ओपनर महेश क्षेत्रीलाई पहिलो बलमै पूर्वाञ्चलका बलर मेहबुब आलमले एल बी डब्लुको शिकार बनाए ।

यसअघि टस हारेर पहिले ब्याटिङको लागि मैदानमा उत्रिएको पूर्वाञ्चलले ३२.३ ओभरमा सबै विकेट गुमाएर १ सय ३ रन मात्र जोड्न सक्यो । पूर्वाञ्चलका लागि अलराउण्डर मेहबुब आलमले सर्वाधिक ३६ तथा ओपनर विधान गोस्वामीले १९ रन बनाए । अर्का ब्याट्सम्यान अंकित सुवेदीले १२ रन बनाउँदा अन्य खेलाडीहरुले दोहोरो अंक जोड्न सकेनन् । आर्मीका लागि सागर पुनले ५, सुशन भारीले ३ तथा सोमपाल कामीले २ विकेट लिए ।

ब्याटिङ र बलिङ दुवैमा उत्कृष्ट प्रदर्शन गर्दै आर्मीका सागर पुन ‘म्यान अफ द म्याच’ बन्न सफल भए । जेठ २४ गते सम्म चल्ने प्रतियोगिता अन्तर्गत भोलि समूह ‘बी’का दुई टोली नेपाल पुलिस र सुदूर पश्चिमाञ्चलबीच प्रतिस्पर्धा हुनेछ ।