Breaking News

आगामी वर्ष नेपालको आर्थिक वृद्धिदर ५.५ प्रतिशत मात्र हुने एडीबीको प्रक्षेपण

काठमाण्डौ, २८ चैत्र । एशियाली विकास बैंक (एडीबी)ले आगामी आर्थिक वर्षमा नेपालको आर्थिक वृद्धिदर ५ दशमलव ५ प्रतिशतमा सीमित रहने प्रक्षेपण गरेको छ ।

बुधबार काठमाडौंमा प्रमुख वार्षिक प्रकाशन ‘एशियाको विकास परिदृश्य’ सार्वजनिक गर्दै एडीबीले चालु ठूला आयोजना तीव्र गतिमा अघि बढ्ने र माथिल्लो तामाकोशी जलविद्युत् आयोजनाबाट ४५६ मेगावाट विद्युत् राष्ट्रिय प्रसारण लाइनमा जोडिने संभावनामा केन्द्रित रहेर एडिबीले उक्त प्रक्षेपण गरेको हो ।

बैंकका देशीय निर्देशक खामुद खानोभले अघिल्लो आर्थिक वर्षकोे तुलनामा चालु आवमा मकै र कोदोजस्ता बर्खे बालीको उत्पादन वृद्धि हुने तर औद्योगिक वृद्धिदर कम हुने अनुमान गरिएको बताए ।

प्रदेश र स्थानीय सरकारको सीमित अनुभव र क्षमता तथा संघीयताको निर्विघ्न कार्यान्वयनको चुनौतीमा केन्द्रित रहेको बताउँदै खानोभले नयाँ गठन भएका स्थानीय र प्रदेश सरकारको खर्चमा वृद्धि र कमजोर राजश्व परिचालन क्षमताका कारण बजेट घाटा बढ्ने आशंका व्यक्त गरे ।

आगामी आवमा औसत मुद्रास्फीति पनि ५ दशमलव ५ प्रतिशत पुग्ने, विप्रेषण आयको मन्द वृद्धि र बढ्दो व्यापार घाटासहित मध्यावधिसम्म बाह्य क्षेत्रको स्थायित्व जोखिममा रहेको जानकारी पनि उनले दिए ।

एडीबीले जलविद्युत् र होटल क्षेत्रमा क्रमिक रूपमा बढेको लगानीले सकारात्मक प्रतिफल दिने प्रक्षेपण गरिएको छ ।

shares