प्रथम दक्षिण एसियाली योगा च्याम्पियनसिप सुरु

लोकेन्द्र विष्ट / काठमाण्डौ, २४ वैशाख । नेपाल योग खेलकुद संघको आयोजनामा प्रथम दक्षिण एसियाली योगा च्याम्पियनसिप आइतबारदेखि सातदोबाटोस्थित अन्तर्राष्ट्रिय खेलकुद परिसरमा सुरु भएको छ ।

प्रतियोगिताको युवा तथा खेलकुद मन्त्री दलजीत श्रीपालीले एक कार्यक्रमबीच उद्घाटन गरे । कार्यक्रमलाई सम्बोधन गर्दै मन्त्री श्रीपालीले युवा र खेलकुदलाई जोडेर योगाको कार्यक्रम अगाडि बढाउने मन्त्रालयको सोच रहेको बताए ।

प्रतियोगितामा नेपालबाट ७६, भारतबाट ७० र बंगलादेशबाट १७ प्रतिस्पर्धी सहभागी छन् । ८ देखि १२, १२ देखि १४, १४ देखि १८ र १८ देखि ३५ वर्ष उमेरसमूहमा प्रतिस्पर्धा भइरहेको छ । ३५ स्वर्ण तथा उत्तिनै रजत र कांस्य गरी जम्मा १ सय ५ पदकका प्रतिस्पर्धा हुनेछ ।

एसियामै पहिलो पटक योगाको च्याम्पियनसिप भएको आयोजक योग खेलकुद संघका महासचिव चूडामणि खरेलले जनाएका छन् ।