November 20, 2017

खुल्ला व्यापारले लाखौं अमेरिकीहरूको रोजगारी खोसिएको ट्रम्पको भनाई

काठमाण्डौं, २४ कार्तिक ।अमेरिकी राष्ट्रपति डोनाल्ड ट्रम्पले अमेरिका अब कुनै पनि रुपमा हुने गरेको व्यापारिक दूर्व्यवहार सहन नसक्ने बताएका छन ।

भियतनाममा आयोजित एशिया प्यासिफिक इकोनोमिक कोअपरेसन (एपेक) को महत्वपूर्ण शिखर सम्मेलनलार्इ सम्बोधन गर्दै   ट्रम्पले भने , ‘एपेक राष्ट्रहरूले सन्तुलित पारस्परिक व्यापारको नीति अवलम्बन गरुन्जेल अमेरिका मिलेर काम गर्न तयार छ।’

उनले खुल्ला व्यापारले लाखौं अमेरिकीहरूको रोजगारी खोसिएको र आफूले उक्त असन्तुलनलार्इ हटाउन चाहेको बताए ।

एशिया-प्रशान्त क्षेत्रीय आर्थिक सहयोग संगठन ( एपेक) अन्तर्गत २१ वटा अर्थतन्त्रहरू संलग्न छन् जुन विश्वको कुल गार्हस्थ उत्पादनको ६० प्रतिशत हुन्छ ।

राष्ट्रपतिको कार्यभार सम्हालेदेखि यता अमेरिकी अर्थव्यवस्थामाथि आघात परेको भन्दै ट्रम्पले १२ वटा एपेक सदस्य राष्ट्रहरूसँगको सहकार्यबाट हात झिकिसकेका छन् ।

भियतनामको दा नाङ्ग सहरमा भइरहेको उक्त सम्मेलनलार्इ सम्बोधन गर्दै चिनियाँ राष्ट्रपति सी जिनपिङले पनि खुल्ला व्यापार “बढी उदार, सन्तुलित, न्यायपूर्ण र सबैलार्इ लाभान्वित तुल्याउने खालको”  हुनुपर्नेमा जोड दिए । राष्ट्रपति ट्रम्प यतिबेला एशियाका पाँच राष्ट्रहरूको भ्रमणको क्रममा छन ।

बिबिसीबाट