अब कतारमा विदेशीहरुका लागि स्थायी निवासको व्यवस्था

 

काठमाण्डाै,२३ साउन  । छिमेकी देशहरुले कुटनैतिक सम्बन्ध तोडिँदा संकट बढ्दै जान थालेपछि कतारको मन्त्रीपरिषद्ले आप्रवासीकालार्इ स्थायी बसोबासका लागि नयाँ कानुन ल्याएको छ ।

नयाँ कानुन अनुसार अब आप्रवासीले कतारमा स्थायी रुपमा बसोबास गर्न पाउनेछन् । आप्रवासीलाई कतारमा बस्न प्रोत्साहन गर्नका लागि नयाँ बसोबासको नीति ल्याइएको हो ।

तर सबै आप्रवासीले स्थायी बसोबासका लागि अनुमति पाउने छैनन् । दक्ष आप्रवासीले कतारको आन्तरिक मन्त्रालयमा बसोबासका लागि निवेदन दिनुपर्नेछ ।

यो नियमले आप्रवासीलाई पनि कतारको निजामती सेवा, सैन्य र सम्पत्तिको स्वामित्व लिन पाउने व्यवस्था गरेको छ । साथै स्थानीयले जस्तै आप्रवासीले पनि शिक्षा र स्वास्थ्यमा पहुँच पाउने व्यवस्था गरिएको छ ।

सामान्यतया कतार, साउदी लगायतका खाडीका देशमा आप्रवासीले व्यापार गर्न र त्यहाँ बस्नका लागि स्थानीयसँग मिलेर लगानी गर्नुपर्ने अनिवार्य नियम छ । अब कतारमा व्यापार गर्नका लागि स्थानीयसँग सहकार्य नगरी व्यापार गर्ने यो व्यवस्थाले छुट दिएको छ ।