June 24, 2017

सरकारलाई दिएको समर्थन फिर्ता,आन्दोलनमा जाने मधेसी मोर्चाको निर्णय

काठमाण्डौ १ चैत्र ।  संयुक्त लोकतान्त्रिक मधेसी मोर्चाले सरकारलाई दिएको समर्थन फिर्ता लिने निर्णय गरेको छ ।

तराई मधेस लोकतान्त्रिक पार्टीको कार्यालयमा बसेको बैठकले सरकारलाई दिएको समर्थन फिर्ता लिने निर्णय गरेको राष्ट्रिय मधेस समाजवादी पार्टीका महासचिव केशव झाले जानकारी दिए । मोर्चासँग आबद्ध सात राजनीतिक दलका ४९ जना सांसदले व्यवस्थापिका–संसद्‌मा प्रतिनिधित्व गर्दै आएका छन् ।

सङ्घीय गठबन्धनको २४ फागुनमा बसेको बैठकले संसद्‌मा दर्ता भएको संविधान संशोधन प्रस्ताव परिमार्जनसहित पारित गर्न र स्थानीय तहको निर्वाचनको घोषणा सात दिनभित्र फिर्ता लिन सरकारसँग माग गरेको थियो । मागका विषयमा सरकारले कुनै पनि पहल कदमी नचालेको भन्दै आजदेखि सरकारलाई दिएको सर्मथन फिर्ता लिइएको मोर्चाको भनाइ रहेकाे छ ।

त्यस्तै मोर्चाको बैठकले विभिन्न तीन चरणमा आन्दोलनका कार्यक्रमसमेत तय गरेको छ । पहिलो चरणको आन्दोलनमा चैतमा माध्यामिक तह (कक्षा १०) को परीक्षा पर्ने भएकाले सामान्य विरोधका कार्यक्रम गर्ने, दोस्रो चरणमा दिन बिराएर आन्दोलन तथा विरोधका कार्यक्रम गर्ने र तेस्रो चरणमा बृहत् कार्यक्रम गर्ने विषयमा छलफल भएको महासचिव झाले जानकारी दिए ।
रासस