June 28, 2017

समयमै विकास बजेट खर्च गर्न संसदीय समितिको निर्देशन

काठमाण्डौ, १९ फाल्गुन । समयमै विकास बजेट खर्च गर्न सम्बन्धित मन्त्रालयलाई संसदीय समितिले निर्देशन दिएको छ ।

सिंहदरबारमा बिहीबार बसेको संसदको विकास समिति बैठकले स्थानीय तथा राष्ट्रियस्तरमा हुने विकास निर्माणको काम प्रभावकारी नभएको निष्कर्ष निकाल्दै यस्तो निर्देशन दिएको हो ।

बैठकले चालु आर्थिक वर्षको आधा अवधिमा १३ प्रतिशत मात्रै विकास बजेट खर्च हुनु दुःखद भएको भन्दै सम्बन्धित मन्त्रालय र सरोकारवाला निकायलाई समयमै विकास निर्माणका लागि छुट्याएको बजेट खर्च गर्न निर्देशन दिएको छ ।

वर्षभरी खर्च नगर्ने र आर्थिक वर्षको अन्तिममा एकैचोटी धेरै बजेट खर्च गर्न खोज्दा विकासको काम प्रभावकारी नभएको निष्कर्ष समितिको छ । समितिले विकास आयोजनाको ठेक्का लिएर काम नगर्ने कम्पनीलाई कारबाही गर्न पनि सम्बिन्धित मन्त्रालयलाई निर्देशन दिएको छ ।

बैठकमा स्थानीय विकास मन्त्री हितराज पाण्डेले स्थानीय निकाय जनप्रतिनिधि बिहीन भएकाले विकास बजेट खर्च गर्न कठिन भएको स्वीकार्दै अफ्नो मन्त्रालयले विकास बजेट बढाउन प्रयास गरिरहेको बताए ।

समिति सदस्यहरुले विकास निर्माणको काम प्रभावकारी नहुनुमा एक पक्षको मात्रै भूमिका नभएको धारणा राखेका थिए ।